"Verilişim təki pozğunlara görə yox, şairə görə bağlansın, vecimə olmaz" - FOTO

Xəbər verdiyimiz kimi, “Space TV”nin efirindəki "Tarixin bir günü" verilişində meyxanaçı Rəşad Dağlının (Əmirov) ad gününün qeyd olunması ilə bağlı kanala xəbərdarlıq edilib.

Kanal.az xəbər verir ki, məsələ ilə bağlı aparıcı Tarix Əliyev (Tolik) sosial şəbəkədə bunları yazıb:

“Bu ad gününü etdiyim üçün çox sevinirəm. Rəşada görə veriliş də bağlansa, heç vecimə olmaz. Təki pozğunlara görə yox, şairə görə bağlansın”.

/axsam.az

***

Bir neçə gün əvvəl “Space TV”nin efirində meyxanaçı Rəşad Dağlının (Əmirov) ad gününün qeyd olunması ilə bağlı kanala xəbərdarlıq edilib.

Kanal.az xəbər verir ki, bunu “Modern.az”a Audiovizual Şuranın Kommunikasiya Sektorunun müdiri Taleh Quliyev bildirib.

O qeyd edib ki, sözügedən məsələ ilə bağlı Şuranın aidiyyəti struktur bölmələri tərəfindən araşdırma aparılıb və araşdırmanın nəticələrinə uyğun olaraq qanunvercilik çərçivəsində kanala rəsmi məktubla xəbərdarlıq edilib.

“Həmçinin, televiziya kanalına bildirilib ki, eyni halın təkrarlanacağı təqdirdə, inzibati cəza tədbiri – sanksiya tətbiq ediləcək”, - Taleh Quliyev vurğulayıb.

Qeyd edək ki, televiziya kanalında ağır cinayətə görə həbs edilən meyxanaçının ad gününün qeyd edilməsi sosial mediada birmənalı qarşılanmayıb. Həmin veriliş Tarix Əliyevin aparıcılığı ilə baş tutub.

Xatırladaq ki, Rəşad Dağlı ötən il noyabrın 9-da Bakının Qaradağ rayonu, Lökbatan qəsəbəsi ərazisində qonşusu - 1979-cu il təvəllüdlü İsgəndər Mehdiyevi maşınında bıçaqla qətlə yetirməkdə təqsirləndirilib. Bakı Ağır Cinayətlər məhkəməsinə qərarı ilə Rəşad Dağlıya 9 il 6 ay həbs cəzası verilib.