![61f80caf022c9_-5e69fda3160622281390029650010531722](/uploads/image/min/2022-01/61f80caf022c9_-5e69fda3160622281390029650010531722.jpg)
"Onlayn nəzir" - Hacı Şahin münasibətini AÇIQLADI
“Məşədi Dadaş” məscidinin imam-camaatı, Qafqaz Müsəlmanları İdarəsinin (QMİ) nümayəndəsi Hacı Şahin Həsənli qanunvericiliyə dini qurumlara ianə edilmiş pul vəsaitləri ilə bağlı dəyişiklik təklifinə münasibət bildirib.
Kanal.az xəbər verir ki, Hacı Şahin APA-ya açıqlamasında deyib ki, nəzir qutusundan yığılan vəsait əsasən dini icmaların fəaliyyətinə yönəldilir.
“Bizim məsciddə əvvəldən nəzir qutusu olmayıb. Onun adı “nəzir qutusu” kimi gedir, amma bu, insanların könüllü ianəsidir. Ümumiyyətlə dini icmalar ianələr hesabına fəaliyyət göstərir. Müasir dövrdə bunun bank hesabları ilə, onlayn qaydada edilməsi normal haldır. Pandemiya vaxtı bizim icmaya yardımlar məhz köçürmələr vasitəsilə olurdu. Xaricdə yaşayan vətəndaşlar da dəstəklərini bu cür ifadə edirdilər”, - o vurğulayıb.
Hacı Şahin Həsənli qeyd edib ki, bu həm şəffaflığı təmin edəcək, həm də müasir dövrün tələbləri ilə uzlaşır: “Ona görə də hesab edirəm ki, bu, normal haldır. Əgər icmalar prosesə nəzarət edəcəklərsə, proses şəffaf icra olunacaqsa, bu, insanlar üçün də bir arxayınlıq yaradacaq ki, ödədikləri vəsait lazımı istiqamətdə xərclənəcək”.
Qeyd edək ki, "Dini etiqad azadlığı haqqında" qanunun 18-ci maddəsinə təklif olunan dəyişiklik layihəsində qeyd edilib ki, Azərbaycanda dini qurumlar ianə edilmiş pul vəsaitlərini plastik kart və elektron ödəmə sistemləri vasitəsilə qəbul edəcək.
- Ölkə
- 31 Yanvar 2022