Kanal.az musavat.com-a istinadən xəbər verir ki, Rusiyanın tanınmış teleaparıcısı, Kremlin əsas təbliğatçılarından biri olan Vladimir Solovyov Azərbaycana qarşı sərt bəyanatla çıxış edib. O, “Soloviev Live” efirində Azərbaycanın guya Rusiya ilə toqquşacağı təqdirdə ciddi nəticələrlə üzləşəcəyini söyləyib:
“Sizə elə gəldi ki, Rusiya zəifdir? Siz çox təəccüblənəcəksiniz. Əgər Azərbaycan hesab edirsə ki, onun arxasında Türkiyə dayanır və o, Dərbənd uğrunda döyüşə bilər… Yaxşı… Hazırda bizim yumşaq qarın bölgəmizdə baş verənlər həm də İranla birgə Xüsusi Hərbi Əməliyyat keçirmək üçün əsas kimi görünə bilər — NATO ölkələrinin dost olmayan təsirinə qarşı. Burada isə Böyük Britaniya və Fransa böyük rol oynayır. Və (təsir göstərənlər) hələ də nəyisə anlamayan ağılsızlardır”.
Musavat.com xatırladır ki, bir gün əvvəl Rusiya prezidenti Vladimir Putin Təhlükəsizlik Şurasının iclasına sədrlik edib. Yayılan məlumatlara görə, həmin toplantıda Kreml rəhbəri şəxsən Azərbaycana qarşı informasiya müharibəsinin intensivləşdirilməsi ilə bağlı tapşırıqlar verib. Əslində, son aylarda iki ölkə arasında münasibətlərdə soyuq müharibəni xatırladan gərginlik müşahidə olunurdu. İndi isə Moskva bu mübarizəni daha da kəskinləşdirərək informasiya cəbhəsini açıq formada işə salır.
Putinin göstərişindən dərhal sonra Kremlə bağlı media şəbəkələri fəallaşıb. Solovyov isə bu prosesin önündə gedən əsas simalardan biridir. O, illərdir Qərbə və Rusiyanın “hədəf elan etdiyi” ölkələrə qarşı hücum ritorikası ilə tanınır. Azərbaycana ünvanlanan son hədəsi də Kremlin siyasətinin bir hissəsi, Putinin göstərişlərinin efirdə səsləndirilməsi kimi dəyərləndirilir.
Beləliklə, Moskva ilə Bakı arasında münasibətlərin artıq “soyuq müharibə” və “informasiya müharibəsi” statusuna gəlib çatdığı görünür. Kremlin təbliğat maşınının “baş köpəklərindən” olan Solovyovun çıxışı da bu siyasətin bariz nümunəsidir.
