İran prezidenti barışıq təklif etdi: "İslahatlar nəzərdən keçirilə bilər"

  • Dünya
  • 30 Sentyabr 2022
633408c7658ba202209224143
  • Oxunub: 290
İranda davam edən etirazları nəzərə alaraq, prezident İbrahim Rəisi ilk dəfə etirazçılara barışıq notası verib.

Kanal.az xəbər verir ki, bu barədə o "İrib" dövlət televiziyasına canlı müsahibəsində bildirib.

"Mən həmişə demişəm ki, biz tənqidlərə də, etirazlara da dözümlülük səviyyəsini qaldırmalıyıq",- deyə İran prezidenti İbrahim Rəisi bildirib.

Rəisinin fikrincə, orada yol açıqdırsa, ölkədə müzakirə mərkəzləri də açmaq olar: "Qanunların icrası və islahatlar da yenidən nəzərdən keçirilə bilər. Bu, hətta ölkəyə də xeyir verə bilər",- deyə o bildirib. Bununla belə, o, hansı qanunlara yenidən baxıla biləcəyini və hicab qadağası kimi İslam qanunlarının da nəzərdə tutulan islahatlara daxil edilib-edilməyəcəyi məsələsinə aydınlıq gətirməyib.

Etirazlara 22 yaşlı Məhsa Əmininin ölümü səbəb olub. Əxlaq polisi onu "qeyri-islam geyimi" iddiasına görə həbs edib. Həbs edildikdən sonra Amini ilə dəqiq nə baş verdiyi bəlli deyil. Gənc qadın komaya düşüb və sentyabrın 16-da xəstəxanada dünyasını dəyişib. Etirazçılar əxlaq polisini zorakılıqda ittiham edirlər. Onlar iddia etdirlər ki, Amini saxlanılan zaman polis onun başına dəyənəklə zərbələr vurub və gənc qadının başını avtomobilə çırpıblar. Polis iddiaları qətiyyətlə rədd edir. O vaxtdan bəri minlərlə insan ölkə boyu hökumətin repressiv kursuna qarşı nümayişlər keçirir.

Əmininin ölümündən dərhal sonra Rəisi onun ailəsi ilə əlaqə saxlayıb və Daxili İşlər Nazirliyinə ciddi araşdırma aparacağına söz verib. "İndi mənə dedilər ki, yaxın bir neçə gündə yekun tibbi ekspertizanın rəyi hazır olacaq. Bundan sonra hökumət və məhkəmə lazımi addımları atacaq",- deyə prezident bildirib.

Bununla belə, Rəisi bir daha vurğulayıb ki, etirazlar iğtişaşlara səbəb olmamalıdır. "Bizim üçün milli təhlükəsizliyə təhdid keçilməməsi lazım olan qırmızı xətdir. Son bir neçə gündə baş verən iğtişaşlar İranın düşmənləri tərəfindən ölkəni və İslam sistemini durğunluğa gətirmək üçün təşkil edilib",- deyən prezident xəbərdarlıq edib ki, polis qüvvələri iğtişaşçılara qarşı ardıcıl tədbirlər görəcək və ədliyyə qanunlar xaricində hərəkət etmiş şəxsləri sərt şəkildə cəzalandıracaq.

Oxşar xəbərlər